بسم الله الرحمن الرحيم
موضوعي عن الاحداث الاخيرة لاعتصام مجلس الوزراء
اولا مصر لازم تتحرك خطوة واحد للامام والا مفيش وراها غير حفرة كبيرة لو وقعت فيها هنضيع كلنا
طب ازاي وكل يوم في ناس بتتظاهر والجيش بيقتل فيهم
لحظة تعالوا نحسبها شوية
انا واحد من اللي نزلوا الثورة هتفت يسقط النظام ويسقط حكم العسكر اتضربت واتروقت ومن كتر ما شميت غاز مسيل للدموع حسيت اني هدمنه ما علينا
نزلت كمان مليونية المحاكمة ليا اصحاب من 6 ابريل والاخوان والسلفيين ومن كل اتجاه وليا اصحاب نصارى
كلنا مصريين
لكن في حاجات غلط اوا انا شايف انها غلط هي لازم تتعمل لكن مش وقتها
يعني مثلا الاعتصامات اللي بتحصل كل شوية رغم انها في الاخر بتنتهي بضحايا وخطوة المجلس بياخدها زي مثلا اخر مرة تحديد الحد الاقصى للاجور
الاعتصامات دي مهمة جدا لكن ده مش وقتها لانها بتعطل الحركة مش هتودينا في حتة دي ممكن ترجعنا اكتر من خطوة لورا
دلوقتي احنا لازم نلتزم بحاجة
ننتظر انتهاء الانتخابات ونفكر بعد كدة في انتخابات الشورى اللي ملوش اي لزمة وبعدين انتخابات الرئاسة
باذن الله لما مصر يبقى ليها رئيس منتخب جديد
هتسترد عافيتها واحدة واحدة بعد كدة نبدا نفكر في محاكمة الحرامية اللي في طرة
مطلوب ان محدش يعمل فتنة
اي نعم اللي حصل من الجنود ده جريمة لكن للمعتصمين الشرفاء ليه تبقوا مع بلطجية وحرامية اللي حرقوا الممتلكات العامة
البنت اللي اتسحلت دي رغم اني بعارض وقوفها واحتكاكها بالجيش حتى لو كانت طبيبة ميدانية وحتى لو كانت الف وحشة
انا زعلت جدا عليها
انا مش لاقي كلام اقوله لان بصراحة قرفان مش فاهم ومش عارف ومش متأكد
انا صح ولا لاء
في ختام كلامي
دعائي لجميع من فقدوا ارواحهم فداء للوطن
اللهم اجعلهم في منزلة الشهداء
ولكل مصابي الثورة
اللهم اتم شفائهم
وللبنت اللي اتسحلت
انتي مهما كنتي انتي اشرف من الشرف
وللبطل النصراني اللي دافع عنها
تعيش يا بطل
