قبل ما ادخل مدرسة
قبل ما اعرف ايه كتاب
قبل ما يخلوني احبك
قلبي فيكي لوحده داب
كنت بحلم امتا هكبر
وابقى فيكي بجد اقدر
قد ما بتديني خيرك
وقد ما بتساعدي غيرك
وادتيني من غير حساب
قلت مية مرة بحبك
خدني حبك للسحاب
وفي ابتدائي
قلبي كان للعشق باقي
كل اليوم الصبح بدري
في الطابور بهتف باسمك
ولو هغيب تلاقيني بجري
وفي خيالي وقلبي رسمك
للساعة دي
كله عادي
بصحى من نومي في معادي
وفي الطابور انا برده بهتف
لكي حبي وفؤادي
ولما روحت ياعم ثانوي
اي ذكرى لنصر سنوي
او مناسبة بانتصار
او مبادرة للعمار
او كتاب وبيحكي عنك
او رواية وفيها قصة
والحكاية ريحتها منك
قلبي ميسيبهاش تعدي
من سكات الاقيه يروحلك
يرسم الضحكة لشفايفك
ببقي نايم وقلبي شايفك
كل دقة فيه تقولك
مستحيل يوم ينسى حبك
لو يتوه الضحك مني
مش هلاقي زي حضنك
ولما افراحي تشاغلني
ابوس ترابك وكاني ضمك
وابتدت احلامي تكبر
وابتديت وبقوة اعبر
عن حقوقي فيكي منك
بس كان الظلم سائد
واللي يحكم فيكي فاسد
عايشة بين مية الف حاسد
واللي خد منك وجاحد
بين شوارعك لما بمشي
بهتدي لو كنت شارد
عشنا بين مغرور وقادر
واللي في ترابك يتاجر
واللي كان يقتل ولادك
وسطنا مهو اصله فاجر
ربنا وحده اللي عالم
امتا تترد المظالم
امتا حقنا هيعود
ناخده من عين كل ظالم
يارب رجعلنا مصر بلدنا بخير
ليست هناك تعليقات:
إرسال تعليق