انا عن ذات ذاتي ذاتي حصلتلي تجارب كتيرة جدا بس الحمد لله بطلع من اي تجربة بفايدة
يعني مثلا
انا قررت في يوم اني افتح ورشة وبالقرار ده واجهت تحديات كتير جدا
ناس كتير اعترضت و ونصحوني باني معملش المشروع ده
بس انا اصريت والحمد لله فتحت الورشة
لكن الناس مسابونيش اكمل واشوف انا هنجح ولا لاء
ناس اقترحوا عليا اني افتح الورشة بس اشتغل في شغلة عشان اقدر اجيب مصاريفي
بالحاح الناس ولاني سيبتلهم وداني يزنوا فيها
عملت زي ما نصحوني
بقيت اشتغل طول اليوم من الساعة 9 الصبح ل 9 بليل في محل موبليا
ومن 9 بليل ل 2 الصبح في ورشتي
والمسافة من المحل لورشتي كانت بالظبط حوالي 6 كيلو
طبعا مبقتش قادر ادي في اي واحدة منهم
بصحى الصبح مش قادر اشتغل
وبروح ورشتي مش شايف قدامي
فضلت ورشتي تخسر لاني طبعا مش واقف فيها
وانا كمان كنت بخسر صحتي بقت في النازل
كنت مهدود دايما
حتى القهوة وقعدتي مع اصحابي كل يوم خميس وجمعة بقيت محروم منها
لاني كنت بشتغل كل يوم حتى الجمعة
اليوم الوحيد اللي كنت بتغدى فيه في البيت برده اتحرمت من اني اتغدى مع امي وابويا واخواتي
لاني بشتغل حتى يوم الجمعة
فضلت على الحال ده 7 شهور
من يوم 1/6/2010
لحد يوم 4/2/2011
بالظبط
والحمد لله على كل شئ
اي نعم انا خسرت فلوس كتير جدا
خسرت حلمي خسرت التحدي اللي حطيت نفسي فيه خليت الناس تقول اني اهو مقدرتش اكمل
بس استفدت حاجة واحدة من كل ده
اني لو بدأت مشوار بخطوة محطش رجلي في سكة تانية لان مش هقدر اكمل غير في سكة واحدة
وعلى راي المعلم مسعد <<< صاحب بالين كداب>>>
انا قلت تجربتي وايه اللي استفدتوا منها ده غير اني استفدت اني اول حاجة افكر فيها هي مصلحتي
ليست هناك تعليقات:
إرسال تعليق