القصة دي انا بكتبها علشان ولادنا وعلشان تكون قصتنا مكتوبة بالتاريخ يا عمري
بدأت اكتبها من يوم 25 سبتمبر وكملت فيها يوم 17 نوفمبر
وباذن الله هحاول كل يوم اكتب عن قصتنا ولو ج\كلمتين
بحبك وللابد
يوم الاحد الموافق 9 سبتمبر وانا في طريقي للشغل شوفت بنت جميلة جدا في العربية شغلتني طول الطريق
قررت اني لازم اعرف هي رايحة فين
مشيت وراها لحد ما عرفت مكان شغلها
وعرفت معاد المرواح بتاعها لكني روحت عند مكان شغلها وفضلت مستني بس للاسف معرفتش اشوفها
وفضلت على الحال ده لحد لما شوفتها يوم الاربعاء اللي بعده يوم 19 سبتمبر ركبت العربية لقيتها موجودة فيها
ولمينا اجرة العربية هي ادتني اجرتها والنص جنيه ده لسة عاينه في حاجاتي الخاصة
تاني يوم نزلت قعدت على القهوة اللي بتمشي من جنبها علشان اعرف فين بيتها وكنت بنزل من بدري جدا بس للاسف مشوفتهاش يوم واتنين وتلاتة
وبعدها بقيت كل يوم ادور عليها في كل مكان بس مشوفتهاش لحد يوم الاثنين الموافق 24 سبتمبر شوفتها في العربية وحلفت مانا سايبها غير لما اعرف فين بيتها وفين سكتها وفعلا
مشيت وراها لحد مكان شغلها وهناك سالتها عن المكتب هيفتح امتاا قالتلي دلوقتي قلتلها وبتخلصوا امتاا بحجة اني عاوز اجي قبل ما يمشوا قالتلي بنخلص الساعة 3 ونص وفي تمام الساعة 3 ونص وعملت الحركتين واني بسال على حاجة
ونزلت مشيت وراها وعرفت فين بيتها ولما سالت عنها الناس قالولي دي بت تمام وزي الفل وقابلت امها وطلبت انهم يسالوا عني كل ده عالسريع
وفي اللحظة دي عرفت ان اسمها رحمة
والنهاردة يوم الثلاثاء 25 سبتمبر جالي الرد بالموافقة الحمد لله وهروح باذن الله يوم الجمعة اتكلم مع اللي شغلت بالي
روحت انا وماما يوم الجمعة الموافق 28 سبتمبر علشان نشوف هنرتاح لبعض ولا ايييييييييييييه
والحمد لله ساعة مشوفتها بقى من قريب واتكلمنا سوااا ارتحتلها جدا والحمد لله هي كمان ارتاحت ليا
في وسط الكلام معاها عرفت ان عيد ميلادها يوم الاثنين الموافق 1 اكتوبر اتفقت مع اهلها وقررت اني لازم اتقدم ليها رسمي بابويا والرجالة في اليوم ده
حسيت انها مبسوطة علشان هتقدملها في يوم عيد ميلادها
واليوم ده بقى كنت مشغول جدا لان كنا بننقل لمحل جديد
ومقدرتش اخلص شغل خالص وكان معادي يومها الساعة 9 بليل اول ما الساعة جت 8 اخدت بعضي وخلعت علشان اروح اطلب ايد اول واحدة احبها بالدرجة دي
وبالفعل روحت انا وبابا وخالي محمد وخالي العربي وايمن ابن عمي وقعدنا مع اهلها خالها حسن وخالها مسعد وبلبل حمايا العزيز وامها زوزا حبيبتي وحموكشة نسيبي حبيبي وحبيبة قلبي طبعا فرفوتة قلبي وعمري
واتفقنا على كل حاجة واتفقنا ان معاد الشبكة يوم الجمعة 12 اكتوبر
اسبوعين لسة وابقى خطيب اجمل انسانة اختارها قلبي
اطول اسبوعين عدووا عليا لكن اكن يوم الخطوبة ده بجد يوم ميلادي الحقيقي
اسعد يوم في حياتي ماسك ايديها وقريب منها وقالتلي بحبك لاول مرة
يارب لك الحمد على اجمل واحلى هدية اكرمتني بيها وهي رحمة حبيبتي ومراتي باذنك بعد فترة قريبة
النهاردة 17 نوفمبر اقدر احكي عن الفترة اللي فاتت وكانها كانت دقيقة
لاني عشت فيهم مع حبيبتي رحمة اجمل عيد واجمل عيد ميلاد مر عليا يوم 15 نوفمبر
بجد انا بعشقك يارحمة
تعرفي يا عمري كل يوم بفضل استناكي الصبح ساعة وبالليل اكتر من ساعتين
بس تعرفي ان دول احلى 3 ساعات بعيشهم لان بكون مستني حبيبة عمري
النهاردة 26 اكتوبر بستناكي ياعمري
ويحلالي استناكي رغم ان الانتظار صعب لكن انتظارك اجمل انتظار يا روحي
عارفة يا عمري نفسي اكون لك كل عشاق الارض
بحبك
اسود اسبوع عشته في حياتي
بدء من يوم الاربع 12 ديسمبر لما زعلت مع حبيبة قلبي واحنا في الشارع
وروحنا البيت واحنا زعلانين مع بعض
بس منمناش قبل ما نتصالح
بعد كدة من يوم السبت 15 ديسمبر لما طلعت قرارات بتقعيل الحظر علي انا وحبيبتي
وبعد كدة بناي مش هوصلها تاني
قضيت اسود اسبوع في حياتي رغم اني كنت بشوفها الصبح وبوصلها الشغل الا اني مكنتش ببقى مرتاح وانا مش بوصلها بليل
لكني مفضلتش ساكت كلمت امها وبلبل وفهمتم ان الطريق خطر واقنعتهم الحمد لله اني لازم اوصلها
حبيبة قلبي رحمة
ليست هناك تعليقات:
إرسال تعليق